Papilloma və Xal Götürülməsi Lazerlə

Boyunda, qoltuqaltında, göz qapağında və ya üzdə olan kiçik törəmələr çox vaxt illərlə narahatlıq yaradır. Bəziləri paltara, boyunbağıya və ya kəmərə ilişib qanayır, bəziləri isə sadəcə görünüşü pozur. Onları evdə sapla bağlamaq, kəsmək və ya yandırmaq infeksiya, çapıq və şübhəli törəmənin gözdən qaçırılması riski yaradır.

Hansı törəmələr götürülür?

• Asılı papillomalar (akroxordon): boyunda, qoltuqaltında, qasıqda və göz qapaqlarında kiçik, yumşaq, asılı dəri parçaları. Ətraflı: papilloma nədir?
• Ziyillər: HPV virusunun yaratdığı sərt, kobud səthli törəmələr. Əllərdə, ayaqlarda və üzdə olur, yoluxucudur. Ətraflı: ziyil nədir?
• Xoşxassəli xallar: dermatoskopiyada zərərsiz olduğu təsdiqlənən kiçik xallar.
• Seboreik keratoz: yaşla əlaqəli, qəhvəyi-qara, səthi kobud törəmələr.
• Ksantelazma: göz qapaqlarında sarımtıl, yumşaq lövhələr. Belə hallarda qanda xolesterol səviyyəsinin yoxlanması da tövsiyə olunur.
• Sirinqoma: göz altında kiçik, sıx yerləşmiş açıq rəngli düyüncüklər.

Götürülmədən əvvəl müayinə niyə vacibdir?

Gözlə zərərsiz görünən hər törəmə həqiqətən zərərsiz olmaya bilər. Bəzi dəri xərçəngi formaları ziyilə, papillomaya və ya adi xala bənzəyə bilər. Ona görə hər törəmə əvvəlcə dermatoskopla qiymətləndirilir. Lazerlə götürülən toxuma laboratoriyaya göndərilə bilmir, buna görə şübhəli törəmələr lazerlə yox, cərrahi yolla götürülür və histoloji analizə göndərilir. Ətraflı: xal götürülməsi.

Götürmə üsulları

Lazer (CO2 və Nd:YAG)

Papillomalar, kiçik xoşxassəli xallar, ksantelazma və sirinqoma üçün effektiv üsullardan biridir. Lazer törəməni qat-qat buxarlandırır, eyni zamanda damarları bağlayır, ona görə qanaxma və tikiş olmur. İz adətən minimal olur. Tünd dərili pasiyentlərdə pigmentasiya riskini azaltmaq üçün lazerin növü və parametrləri ayrıca seçilir.

Kriodestruksiya

Maye azotla dondurma üsulu. Xüsusilə əllərdə və ayaqlarda olan ziyillər üçün tətbiq olunur, bəzən bir neçə seans lazım olur. Ziyilin müalicə üsulları barədə bu məqalədə ətraflı yazmışıq.

Cərrahi götürmə

Böyük, dərin və ya şübhəli törəmələr üçün. Toxuma histoloji analizə göndərilir.

Prosedur necə keçir?

1. Müayinə. Həkim hər törəməni dermatoskopla qiymətləndirir və hansının hansı üsulla götürüləcəyini izah edir.
2. Anesteziya. Kiçik törəmələr üçün anestezik krem, böyüklər üçün lokal anesteziya iynəsi tətbiq olunur. Bu sayədə prosedur zamanı ağrı minimal olur.
3. Götürmə. Kiçik papilloma bir-iki dəqiqədə götürülür. Bir seansda bir neçə törəmə götürmək mümkündür.
4. Qulluq. Sahəyə bərpaedici məlhəm çəkilir, evdə qulluq qaydaları izah olunur.

Prosedurdan sonra elə həmin gün gündəlik həyata qayıtmaq olur. Üzdəki kiçik qabıqlar kosmetika ilə örtülə bilər. Qabıq adətən 5-10 günə düşür.

Götürüldükdən sonra qulluq

• ilk 24 saat sahəni quru saxlayın;
• qabığı qoparmayın;
• bərpaedici məlhəmi gündə 2-3 dəfə çəkin;
• bir həftə sahəyə kosmetika çəkməyin;
• üç ay ərzində günəş kremi (SPF 50) istifadə edin.

HPV ilə əlaqəli ziyil götürülsə də virus orqanizmdə qala bilər. Ona görə zamanla başqa yerdə yeni ziyil yarana bilər, bu, prosedurun uğursuzluğu demək deyil.

Qiymət

Qiymət törəmənin növündən, ölçüsündən, yerindən, sayından və seçilən üsuldan asılıdır. Çoxsaylı törəmələr bir seansda götürülə bilər. Dəqiq qiymət müayinədən sonra deyilir. Məlumat üçün +994 50 519 42 19.

Dr. Mehdi Mahmudi

Dr. Mehdi Mahmudi 24 ildən artıq təcrübəyə malik dermatoloq-kosmetoloqdur, Bakıda, Salutem Dermatoloji Klinikasında qəbul edir. Hər törəməni götürməzdən əvvəl dermatoskopla qiymətləndirir və üsulu törəmənin növünə görə seçir. Həkim haqqında ətraflı Haqqımda səhifəsində.

Əlaqəli səhifələr

• Xal götürülməsi
• CO2 lazer cərrahiyyəsi
• Ziyil müalicəsi
• Dəri cərrahiyyəsi