Batmış Dırnaq Müalicəsi və Dırnaq Cərrahiyyəsi

Batmış dırnaq ən çox ayağın baş barmağında olur. Ayaqqabı geyinmək və yerimək ağrılı olur, bəzən gecə yorğanın toxunması belə narahatlıq yaradır. Dırnağın kənarını "V" şəklində kəsmək, altına pambıq qoymaq və ya evdə kəsib çıxarmaq çox vaxt problemi daha da ağırlaşdırır.

Batmış dırnaq niyə yaranır?

• dırnağın düz deyil, kənarlardan dairəvi kəsilməsi və ya çox qısa kəsilməsi;
• dar və ya burnu ensiz ayaqqabı, hündür daban;
• dırnağın anadangəlmə geniş və ya əyri forması;
• barmaq zədəsi;
• ayağın çox tərləməsi və dəri qatlarının qalınlığı;
• dırnaq göbələyi nəticəsində dırnağın qalınlaşması. Ətraflı: dırnaq göbələyi nədir?

Nə vaxt həkimə müraciət etmək lazımdır?

• ağrı bir həftədən çoxdur keçmir;
• barmaqda qızartı, şişkinlik, istilik hissi var;
• irin və ya sarımtıl axıntı var;
• dırnağın kənarında qırmızı, asan qanayan toxuma ("vəhşi ət") əmələ gəlib;
• eyni dırnaq əvvəllər də batıb;
• ayaqqabı geyinmək və yerimək çətinləşib.

Müalicə üsulları

Konservativ müalicə

İlk dəfə və yüngül dərəcədə batmış dırnaqda dırnağın düzgün kəsilməsi, isti vannalar, iltihabı azaldan vasitələr və uyğun ayaqqabı kifayət edə bilər. İnfeksiya varsa, əvvəlcə o müalicə olunur.

Dırnağın kənarının götürülməsi (paz şəkilli rezeksiya)

Lokal anesteziya altında dırnağın batmış kənarı, adətən bir neçə millimetr eni, götürülür. Dırnağın qalan hissəsi yerində qalır. Prosedur 15-25 dəqiqə çəkir.

Matriksektomiya

Dırnaq dəfələrlə batırsa, götürülən kənarın kök hissəsi (matriks) kimyəvi üsulla və ya elektrokoaqulyasiya ilə elə işlənir ki, həmin kənar bir daha böyüməsin. Bu üsulla təkrarlanma riski xeyli azalır. Dırnaq bir qədər daralır, amma görünüşü təbii qalır. Prosedur 25-40 dəqiqə çəkir.

Dırnaq bütövlükdə nadir hallarda götürülür. Əksər pasiyentdə yalnız problemli kənar işlənir.

Prosedur necə keçir?

1. Müayinə. Həkim dırnağı və ətraf toxumanı qiymətləndirir, üsulu seçir.
2. Anesteziya. Barmağın dibinə lokal anesteziya edilir. Bundan sonra prosedur zamanı ağrı minimal olur.
3. Prosedur. Dırnağın batmış hissəsi götürülür, lazım olduqda kök hissəsi işlənir, "vəhşi ət" təmizlənir.
4. Sarğı. Barmaq steril sarğı ilə bağlanır, ağrıkəsici və qulluq qaydaları izah olunur.
5. Nəzarət. Bir neçə gündən sonra sarğı dəyişdirilir və sağalma yoxlanılır.

Prosedurdan sonra öz ayağınızla evə qayıdırsınız. Tam sağalma adətən 1-2 həftə çəkir, matriksektomiyadan sonra bir qədər uzun ola bilər.

Prosedurdan sonra qulluq

• ilk 24-48 saat ayağı mümkün qədər yuxarıda saxlayın;
• sarğını təmiz və quru saxlayın, həkimin göstərdiyi qaydada dəyişin;
• 1-2 həftə geniş, burnu açıq ayaqqabı geyinin;
• yara tam sağalana qədər hovuza, dənizə və hamama getməyin;
• qaçış və futbol kimi ağır idmanı 2-3 həftə təxirə salın.

Təkrarlanmanın qarşısını necə almaq olar?

• dırnağı düz xətt üzrə kəsin, kənarlarını dərinə doğru dairəvi kəsməyin;
• dırnağı çox qısa kəsməyin;
• barmaqları sıxmayan ayaqqabı geyinin;
• ayaqları quru saxlayın, dırnaq göbələyi varsa müalicə etdirin.

Əl və ayaq dırnaqlarına qulluq barədə: əl və dırnaq xəstəlikləri.

Qiymət

Qiymət seçilən üsuldan (kənarın götürülməsi və ya matriksektomiya), dırnaqların sayından və infeksiyanın olub-olmamasından asılıdır. Dəqiq qiymət müayinədən sonra deyilir. Məlumat üçün +994 50 519 42 19.

Dr. Mehdi Mahmudi

Dr. Mehdi Mahmudi 24 ildən artıq təcrübəyə malik dermatoloq-kosmetoloqdur, dəri cərrahiyyəsi üzrə də ixtisaslaşıb. Bakıda, Salutem Dermatoloji Klinikasında qəbul edir. Həkim haqqında ətraflı Haqqımda səhifəsində.

Əlaqəli səhifələr

• Dəri cərrahiyyəsi
• Dırnaq göbələyi nədir?
• Əl və dırnaq xəstəlikləri