PRP Saç Müalicəsi

PRP saç tökülməsinin səbəbini aradan qaldırmır, follikulların işini dəstəkləyir. Ona görə müalicədən əvvəl saç tökülməsinin növü və səbəbi müəyyən edilməlidir. Bəzi hallarda PRP digər müalicələrlə birlikdə tətbiq olunur. Ətraflı: saç tökülməsi müalicəsi.

PRP necə hazırlanır və necə təsir edir?

Pasiyentdən adi qan analizindəki kimi az miqdarda qan alınır. Qan xüsusi sentrifuqada fırladılır və trombositlərlə zəngin plazma ayrılır. Bu plazma nazik iynələrlə baş dərisinin seyrəlmiş nahiyələrinə yeridilir. Trombositlərdən ayrılan böyümə faktorları follikulların qidalanmasını və aktivliyini artırır, saçın böyümə fazasını uzadır.

Kimlər üçün uyğundur?

• İrsi (androgenetik) saç tökülməsi: xüsusən erkən və orta mərhələdə, saç kökləri hələ qorunub qalanda.
• Stress, doğuş və ya xəstəlikdən sonrakı tökülmə: saçın bərpa prosesini sürətləndirmək üçün.
• Ocaqlı saç tökülməsi: bəzi hallarda digər müalicələrlə birlikdə.
• Saç əkimindən sonra: köçürülən saçların sağalmasını dəstəkləmək üçün.

Saç kökləri artıq tamamilə itmiş, baş dərisinin parıldadığı nahiyələrdə PRP saçı geri qaytarmır. Belə hallarda saç əkimi müzakirə olunur.

Kimlərə tətbiq olunmur?

Hamiləlik və əmizdirmə dövründə, qan xəstəliklərində, trombosit sayının az olduğu hallarda, aktiv infeksiyada və bəzi dərmanların, məsələn, qanı duruldan preparatların qəbulu zamanı PRP aparılmır və ya təxirə salınır. Qəbul etdiyiniz dərmanlar barədə həkimə mütləq deyin.

Müalicə necə keçir?

1. Müayinə. Saç tökülməsinin növü, trixoskopiya, lazım olduqda qan analizləri.
2. Qan alınması və plazmanın hazırlanması. 15-20 dəqiqə.
3. Yeridilmə. Plazma baş dərisinə nazik iynələrlə yeridilir. Narahatlığı azaltmaq üçün soyutma və ya anestezik krem istifadə edilə bilər.
4. Sonra. Həmin gün gündəlik həyata qayıdırsınız. Bir neçə saat baş dərisində həssaslıq ola bilər.

Adətən 4-6 seans, aralarında təxminən 4 həftə fasilə ilə aparılır. Sonra nəticəni qorumaq üçün ildə 1-2 dəstəkləyici seans tövsiyə oluna bilər.

Nəticə nə vaxt görünür?

Saç tökülməsinin azalması adətən 2-3 seansdan sonra hiss olunur. Saçın sıxlaşması və yeni saçların görünməsi isə bir neçə ay çəkir. Bəzi pasiyentlərdə ilk seanslardan sonra müvəqqəti tökülmə artımı ola bilər. Bu, zəif saçların yeniləri ilə əvəzlənməsi ilə bağlıdır və keçicidir. İrsi saç tökülməsində nəticə müalicə və dəstəkləyici seanslar davam etdikcə qorunur.

Prosedurdan sonra

• ilk 24 saat başınızı yumayın, saça boya və ya kimyəvi vasitə çəkməyin;
• bir neçə gün sauna, hovuz və ağır idmandan çəkinin;
• həkimin təyin etdiyi digər müalicələri davam etdirin.

Qiymət

Qiymət seans sayından və müalicə planından asılıdır. Dəqiq qiymət müayinədən sonra deyilir. Məlumat üçün +994 50 519 42 19.

Dr. Mehdi Mahmudi

Dr. Mehdi Mahmudi 24 ildən artıq təcrübəyə malik dermatoloq-kosmetoloqdur, saç və baş dərisi xəstəlikləri ilə məşğul olur. Bakıda, Salutem Dermatoloji Klinikasında qəbul edir. Ətraflı: Haqqımda.

Əlaqəli səhifələr

• Saç tökülməsi müalicəsi
• Saç üçün mezoterapiya
• Saç tökülməsi və müalicəsi