Çil və Ləkə Müalicəsi Bakıda

Bütün tünd ləkələr eyni deyil, ona görə eyni üsulla müalicə olunmur. Çil üçün uyğun olan güclü lazer melazmanı daha da tündləşdirə bilər. Ona görə müalicədən əvvəl ləkənin növü dəqiq müəyyən edilməlidir. Bəzi ləkələr isə, xüsusən yeni yaranan, böyüyən və ya qeyri-bərabər rəngli olanlar, kosmetik problem deyil və dermatoskopla yoxlanmalıdır. Ləkələr barədə ətraflı: ləkə müalicəsi və melazma.

Ləkə növləri

• Çillər: günəşdə tündləşən kiçik, açıq-qəhvəyi ləkələr. Açıq dərili insanlarda daha çox olur.
• Günəş ləkələri (lentigo): illərlə günəşə məruz qalan üz, əllər və çiyinlərdə yaranan, daha iri və sərhədləri aydın ləkələr.
• Melazma: alında, yanaqlarda, üst dodaqda simmetrik qəhvəyi-boz ləkələr. Hormonal dəyişikliklər (hamiləlik, hormonal dərmanlar), günəş və irsi meyil rol oynayır.
• İltihabdan sonrakı piqmentasiya: sızanaq, zədə və ya dəri qıcıqlanmasından sonra qalan tünd ləkələr. Tünd dərili insanlarda daha çox rast gəlinir.
• Dərin piqment ləkələri (Ota nevusu və s.): göz ətrafı, yanaq və alında boz-mavi ləkələr. Xüsusi lazer tələb edir.

Dəridə qəhvəyi ləkələrin digər səbəbləri barədə: dəridə qəhvəyi ləkələr.

Müayinə

Həkim ləkəni gözlə, dermatoskopla və lazım olduqda Vud lampası ilə müayinə edir. Bu, ləkənin növünü və piqmentin dərinin hansı qatında yerləşdiyini müəyyən etməyə kömək edir. Müalicə planı, seans sayı və gözlənilən nəticə müayinədən sonra izah olunur.

Müalicə üsulları

Lazer

Piqmentə təsir edən Q-switched Nd:YAG lazer çil, günəş ləkələri və dərin piqment ləkələri üçün tətbiq olunur. Lazer piqmenti xırda hissəciklərə parçalayır, orqanizm onları tədricən təmizləyir. Ləkə ilə yanaşı qırış və dəri strukturu da yaxşılaşdırılmalıdırsa, fraksional lazer seçilə bilər. Bəzi hallarda IPL istifadə olunur.

Yerli müalicə

Melazma və iltihabdan sonrakı piqmentasiyada əsas üsuldur. Piqment istehsalını azaldan kremlər həkim nəzarəti altında təyin olunur.

Pilinq və digər prosedurlar

Dərinin səthi qatlarını yeniləyən prosedurlar ləkələrin açılmasına kömək edir və digər üsullarla birlikdə tətbiq oluna bilər. Ətraflı: pilinq.

Günəşdən qorunma

Hər gün yüksək faktorlu günəş kremi istənilən ləkə müalicəsinin əsasıdır. Günəşdən qorunmadan aparılan müalicənin nəticəsi qısa müddətli olur.

Melazma barədə bilməli olduqlarınız

Melazma ən çətin müalicə olunan ləkə növüdür. Müalicə ilə əhəmiyyətli dərəcədə açılır, amma günəş, isti və hormonal dəyişikliklər onu yenidən aktivləşdirə bilər. Ona görə melazmada məqsəd ləkəni "birdəfəlik silmək" deyil, açmaq və uzun müddət açıq saxlamaqdır. Bunun üçün müalicədən sonra da dəstəkləyici kremlər və ciddi günəşdən qorunma davam etdirilir. Melazmada yanlış seçilmiş güclü lazer ləkəni tündləşdirə bilər. Prosedurlar ehtiyatla, yumşaq parametrlərlə seçilir.

Müalicə necə keçir?

1. Müayinə. Ləkənin növü müəyyən edilir və üsul seçilir.
2. Prosedur. Lazer seansı sahədən asılı olaraq 10-30 dəqiqə çəkir. Lazım olduqda anestezik krem tətbiq olunur.
3. Sonra. Ləkə bir neçə gün tündləşib nazik qabıq verə bilər, qabıq 5-10 günə düşür. Seanslar arasında adətən 4-6 həftə fasilə olur.

Çillər və günəş ləkələri üçün adətən 1-3 seans, iltihabdan sonrakı piqmentasiya üçün daha çox seans lazım olur. Melazmada müalicə daha uzun çəkir və dəstəkləyici qulluq tələb edir.

Hazırlıq və qulluq

• prosedurdan əvvəl 4 həftə günəşdə qaralmayın, solyariyə getməyin;
• həkim tövsiyə edibsə, iki həftə əvvəl retinol və aktiv turşulu kosmetikanı dayandırın;
• qabıqları qoparmayın;
• müalicə dövründə hər gün yüksək faktorlu günəş kremi çəkin və 2-3 saatdan bir təzələyin.

Mümkün yan təsirlər: müvəqqəti qızartı və şişkinlik, nadir hallarda müvəqqəti tündləşmə və ya açılma. Düzgün seçilmiş parametrlər və qulluqla bu risklər azalır.

Qiymət

Qiymət ləkənin növündən, sahənin ölçüsündən və seans sayından asılıdır. Dəqiq qiymət müayinədən sonra deyilir. Məlumat üçün +994 50 519 42 19.

Dr. Mehdi Mahmudi

Dr. Mehdi Mahmudi 24 ildən artıq təcrübəyə malik dermatoloq-kosmetoloqdur və Bakıda, Salutem Dermatoloji Klinikasında qəbul edir. Ləkə müalicəsində üsulu ləkənin növünə görə seçir. Melazmada isə realist gözlənti və uzunmüddətli nəzarəti əsas tutur. Həkim haqqında ətraflı Haqqımda səhifəsində.

Əlaqəli səhifələr

• Günəş ləkəsi və melazma nədir?
• Dəridə qəhvəyi ləkələr
• Sızanaq müalicəsi
• Xal götürülməsi