Fraksional lazer sonrası qulluq: 0–30 gün bərpa planı(gün-gün)

Fraksional lazer sonrası nəticənin keyfiyyəti təkcə prosedurla yox, sonrakı qulluqla da müəyyən olunur. Əgər ümumi məlumat axtarırsansa, əvvəlcə fraksional lazer haqqında əsas məqaləmizə keçid et.

İlk 0-24 saat: 

• Dəriyə toxunmağı minimuma endir.
• Üzü yalnız həkimin tövsiyə etdiyi yumşaq təmizləyici ilə yu. (sürtünmədən).
• İsti su, buxar, sauna, hamam qəti olmaz.
• Dərini “soyutmaq” üçün buz birbaşa dəriyə qoyulmaz (lazımdırsa, nazik parça üzərindən qısa müddət).
  
  

1-3-cü gün: 

Bu günlərdə:

• Qızartı, yüngül şişkinlik, “yanıq kimi” hiss çox yayğındır.
• Dərinin nəm balansını qorumaq əsas hədəfdir.

Ediləcək:

• Sadə, qoxusuz nəmləndirici istifadə et (həkim nə tövsiyə edibsə).
• Gün ərzində dərini dartacaq qədər qurudursa, nəmləndirməni artır.

Edilməyəcək:

• Retinol, AHA/BHA turşuları, skrab, pilinq, spirtli toniklər.
• Aktiv sızanaq dərmanları (həkim deməyibsə).
  
  

4-7-ci gün: 

Bu mərhələdə dəri “yenilənir” və qabıqlanma ola bilər.

VACİB: Qabıqları qoparma. Qoparmaq ləkə və iz riskini artırır.

Həkim müayinəsi olmadan edilən müalicə
bərpaolunmaz nəticələr doğura bilər!

Dermatoloq Mehdi Mahmudi

Bunları et:

• Üzü yuyanda çox yumşaq davran.
• Nəmləndirici + gün qoruyucu rutinini pozma.
• Çox quruluq varsa, həkimin icazəsi ilə bariyer bərpaedici krem seç.

SPF (gün qorunması): nəticəni qoruyan əsas addım

Fraksional lazer sonrası günəş qorunması “opsional” deyil.

• SPF 50+ gündüz mütləq.
• Evdən çıxmasan belə, pəncərə işığı təsir edə bilər.
• Çöldə qalacaqsansa, SPF-i yenilə (xüsusən uzun müddət).

Qeyd: Günəşə çıxmaq ləkə riskini artıran ən əsas faktorlardandır.

Makiyaj, idman, sauna: nə vaxt olar?

Ümumi qayda (fərdi vəziyyətə görə dəyişə bilər):

• Makiyaj: adətən qabıqlanma azaldıqdan sonra (çox vaxt 5-7 gün).
• İdman: güclü tərləmə və qızarma yaradan məşqləri ilk həftə ertələ.
• Sauna/hamam/buxar: ən az 1-2 həftə uzaq dur.

Ən doğru vaxtı həkim müəyyən edir.

Retinol, AHA/BHA, C vitamini

Sual: Nə vaxt başlamaq olar?

Bu hissədə səhv edən çox olur.

• Retinol / turşular (AHA/BHA): adətən dəri tam sakitləşəndən sonra (çox vaxt 2-4 həftə).
• C vitamini: həssaslıq yüksəkdirsə tələsmə; qıcıqlandıra bilər

Əgər yanma, dartınma, qızartı artırsa — həm retinol, həm də C vitamini istifadəsini dayandır.

Nəticə nə vaxt görünür?

• İlk “sakitləşmə” çox vaxt 1 həftə içində olur.
• Kollagen yenilənməsi isə mərhələli gedir: real dəyişikliklər həftələr-aylar ərzində daha aydın görünür.
  
  

Nə vaxt həkimə müraciət etmək lazımdır?

• Qızartının günbəgün artması
• Güclü ağrı və ya istilik hissinin artması
• Şübhəli ifrazat/qoxu
• Geniş yayılmış güclü şişkinlik və ya kəskin pisləşmə