Günəş Kremi Necə Seçilir və Necə İstifadə Olunur?

Günəş şüaları dəriyə necə təsir edir?

Günəş şüaları bir çox dəri probleminə - ləkə, qırışlar, dərinin bəd xassəli şişlərinə səbəb olmaqla yanaşı, akne və rozasea kimi əvvəlcədən mövcud olan dəri xəstəliklərini də şiddətləndirə bilir. Günəş şüalarının 3 növü var:

• UVA - şüaları dəridə erkən yaşlanma və qırışlara səbəb olur.
• UVB - şüaları dərinin üst təbəqəsinə nüfuz edir, dəridə bronzlaşma və yanıqlara səbəb olur.
• UVC - ən zərərli şüa növüdür. Stratosfer təbəqəsi tərəfindən udulur və yer səthinə demək olar ki, çatmır. Sterilizasiya məqsədilə istifadə edilir.

Dərinin günəş işığına həssaslığına görə dəri tipləri I tipdən (ən açıq rəngli dəri) VI tipə qədər (ən tünd rəngli dəri) sinifləndirilmişdir. I və II dəri tipinə sahib insanların xərçəng və dəri yaşlanması riski daha çoxdur. Ancaq erkən yaşlanma bütün dəri tiplərində günəş şüalarına məruz qaldıqdan sonra görülə bilər.

Günəş kremi necə seçilir?

Günəş şüalarının zərərli təsirindən qorunmaq üçün günəş kremləri ilin bütün fəsillərində istifadə olunmalıdır. Bəs günəş kremi seçərkən nələrə diqqət edilməlidir?

1. Ən az 30 SPF (sun protection factor) günəş kremlərinə üstünlük verilməlidir.
2. Broad Spektrum - geniş təsir spektrumuna malik olmalıdır. Yəni həm UVA, həm də UVB şüalarından qoruması olmalıdır.
3. Water resistant - suya  dayanıqlı olmalıdır.

Günəş kremləri necə istifadə edilməlidir?

Günəşə çıxmazdan 15-20 dəqiqə əvvəl üz və boyun dərisinə, eləcə də açıqda qalan digər dəri sahələrinə sürülməli, hər 2 saatdan bir, üzdükdən və ya tərlədikdən sonra isə dərhal yenilənməlidir.

Unutmayın ki, iyirmili yaşlarda istifadə olunan günəş kreminin yerini qırxlı yaşlarda edilən heç bir kosmetoloji prosedur doldura bilməz. Dərinizin qeydinə qalın.

Günəş kremi haqqında tez-tez verilən suallar

Günəş kremi neçə SPF olmalıdır?

Ən azı SPF 30 olan, geniş spektrli (UVA və UVB) və suya davamlı günəş kremi seçilməlidir.

Günəş kremi nə vaxt və neçə saatdan bir çəkilməlidir?

Günəşə çıxmazdan təxminən 15–20 dəqiqə əvvəl açıqda qalan bütün dəriyə çəkilməli, hər 2 saatdan bir, üzdükdən və ya tərlədikdən sonra isə dərhal yenilənməlidir.

Qışda da günəş kremi lazımdırmı?

Bəli. Günəş şüalarının zərərli təsirindən qorunmaq üçün günəş kremi ilin bütün fəsillərində istifadə olunmalıdır.

UVA və UVB şüalarının fərqi nədir?

UVA şüaları dəridə erkən yaşlanma və qırışlara, UVB şüaları isə bronzlaşma və günəş yanığına səbəb olur. Ən zərərli olan UVC şüaları stratosfer tərəfindən udulur və yer səthinə demək olar ki, çatmır.

Elmi mənbələr

1. American Academy of Dermatology. How to select a sunscreen.
2. American Academy of Dermatology. How to apply sunscreen.
3. DermNet. Skin phototype (Fitzpatrick skin type).